Saurabh Shekhar
asan to na tha dhuup men sahra ka safar kuchh
ba-faiz magar milte rahe mujh ko shajar kuchh
pursish na karo mujh se mara haal na puchho
ukhḌa sa zara rahta hai ji mera idhar kuchh
sailab na ho to na ho dil men bhi talatum
paani to rahe Duub ke marne ko magar kuchh
itna hi ghani hai jo samundar to kaho vo
sahil pe baha laa.e kabhi la.al-o-guhar kuchh
nazil hai jo ye ujla sa andhera sa faza par
mumkin hai ki is shab men ho paivast sahar kuchh
avaz bhi lahra.i thi halchal bhi hui thi
ik pal ko to kuchh ubhra tha aaya tha nazar kuchh
shanon ka ye ḳham tujh men na.i baat hai ‘saurabh’
a.ina kabhi dekho rakho apni ḳhabar kuchh
Leave a Reply