Dosti Jab Kisi Se Ki Jae

dosti jab kisi se ki jaae

dushmanon ki bhi raae li jaae

maut ka zahr hai fazaon men

ab kahan ja ke saans li jaae

bas isi soch men huun Duuba hua

ye nadi kaise paar ki jaae

agle vaqton ke zakhm bharne lage

aaj phir koi bhuul ki jaae

lafz dharti pe sar patakte hain

gumbadon men sada na di jaae

kah do is ahd ke buzurgon se

zindagi ki dua na di jaae

botalen khol ke to pi barson

aaj dil khol kar hi pi jaae

Leave a Comment