Chand Lamhon Mein Ghubar-E-Karwan Rah Jaega

Kausar Siddiqi

chand lamhon men ghubar-e-karvan rah ja.ega

ḳhaak ho ja.unga main jal kar dhuan rah ja.ega

sham-e-mahfil raqs-e-bismil ka na hoga kuchh vajud

anjuman men girya-e-nauha-e-giran rah ja.ega

kar ke hijrat duur sahra men chale ja.enge log

shahr men jalte makanon ka dhuan rah ja.ega

Dhanp dega apni chadar se mujhe gard-o-ghubar

mere naqsh-e-pa ka dhundla sa nishan rah ja.ega

mimbar-o-mehrab ho ja.enge suune ek roz

gumbad-o-minar par shor-e-azan rah ja.ega