Krishn Bihari Noor
yuun davat-e-shabab na do main nashe men huun
ye dusri sharab na do main nashe men huun
aisa na ho ki nashshe men kaT jaa.e zindagi
ankhon ko koi ḳhvab na do main nashe men huun
itna bahut hai tum se nigahen mili rahen
ab bas karo sharab na do main nashe men huun
yaaro dil-o-dimagh men kaafi hai fasla
uljhe hue javab na do main nashe men huun
aisa na ho ki raaz tumhara main khol duun
dekho mujhe javab na do main nashe men huun
daman ka hosh hai na gareban ka hosh hai
kanTon bhara gulab na do main nashe men huun
ḳhud ko sambhalna yahan mushkil hai dosto
chhalki hui sharab na do main nashe men huun
jo lamhe ‘nur’ hosh men rah kar guzar ga.e
un ka abhi hisab na do main nashe men huun
Leave a Reply