poet

Pahlu-O-Pusht-O-Sina-O-Rukhsar Aaina

pahlu-o-pusht-o-sina-o-rukhsar aaina

hai razm-gah-e-husn ka ye chaar aaina

kaf aaina bar aaina rukhsar aaina

hai sar se paanv tak vo sitamgar aaina

hatta nahin jo samne se us ke raat din

ham se siva hai talib-e-didar aaina

ye to mira raqib hai main manta nahin

kyuun dekhta hai aap ko har baar aaina

rukh ka hai aks dil men to rukh men hai dil ka aks

hai aaine ke samne har baar aaina

khalvat men us ke nuur se aalam hai tuur ka

hain ab-o-tab se dar-o-divar aaina

ghash kha ke gir pade na kahin roab-e-husn se

is vaste hai pusht ba-divar aaina

kis men hai ab-o-tab siva dekh lijiye

ik baar us ka chehra aur ik baar aaina

rukh ka aur us ka ho gaya ik baar faisla

achchha hua ki maan gaya haar aaina

labrez hai shua-e-rukh-e-dil-faroz se

le ab-e-husn-e-saghar-e-sarshar aaina

‘parvin’ jahan men us ki jhapakti nahin palak

hairat ka aap karta hai iqrar aaina

More Poems

Leave a Comment