miri zindagi ki kitab men yahi naqsh hain mah-o-sal ke
vo shagufta rang uruuj ke ye shikasta rang zaval ke
tire husn se mire ishq tak ye jo nisbaton ke hain silsile
ye shajar hain ek hi baagh ke ye samar hain ek hi Daal ke
main suna.un kya koi dastan ki subut-e-gham bhi nahin raha
mire ishq naame ko le gaya koi taq-e-jan se nikal ke
mire baagh men vo gulab tha ki mahak raha tha chaman chaman
vo jo gum hua to bikhar ga.e sabhi rang huzn-o-malal ke
koi ḳhvab hai na ḳhayal hai koi aarzu hai na justuju
ye kahan hai la ke biTha diya mujhe qaid-e-jan se nikal ke
main bhaTak raha tha jihat jihat tire naqsh-e-pa ki talash men
mire saath saath chala kiye ka.i aks ḳhvab-o-ḳhayal ke
mujhe shahrah-e-hayat par ka.i aise ghar bhi mile ‘ziya’
jahan qumqume na jale kabhi na vo hijr ke na visal ke
Leave a Reply