Arshad Abdul Hamid
jins-e-maḳhlut hain aur apne hi azar men hain
ham ki sarkar se bahar hain na sarkar men hain
aab aate hi chamak uThte hain sab naqsh-o-nigar
ḳhaak men bhi vahi jauhar hain jo talvar men hain
sab faroshinda-e-hairat huun zaruri to nahin
ham se be-zar bhi is raunaq-e-bazar men hain
halqa-e-dil se na niklo ki sar-e-khucha-e-ḳhak
aish jitne hain isi kunj-e-kam-asar men hain
ho chuka adl dukan band kar ai tajir-e-haq
ye saza kam hai ki hazir tire darbar men hain
Leave a Reply