apne hi sajde ka hai shauq mere sar-e-niyaz men
ka.aba-e-dil hai samne mahv huun main namaz men
biina hai gar to ḳhaak Daal dida-e-imtiyaz men
jaam o ḳhum-o-subu na dekh mai-kada-e-majaz men
kis ka farogh-e-aks hai kaun hai mahv-e-naz men
kaund rahi hain bijliyan a.ina-e-majaz men
sub.h-e-azal hai sub.h-e-husn sham-e-abad hai dagh-e-ishq
dil hai maqam-e-irtibat silsila-e-daraz men
parda-e-e’tibar-e-ghair pairahan-e-ḳhudi hai chaak
husn-e-azal hai jalva-rez sadma-e-dil-gudaz men
aql-o-shu.ur bhi hain kya uqda-e-raz-e-dahr hain
rah ga.e aur ulajh ke ham sa.i-e-kashud-e-raz men
yaad kisi ki aa ga.i kaT ga.i zindagi ki raat
varna kahan numud-e-sub.h aisi shab-e-daraz men
dafn hai dil jagah jagah ka.aba hai gaam gaam par
sajda kahan kahan kare koi harim-e-naz men
husn ke astane par nasiya rakh ke bhuul ja
fikr-e-qubul-o-rad na kar pesh-kash-e-niyaz men
ḳhuun ke ansuon se hai zinat-e-husn-e-dil ‘jigar’
chahiye dagh-e-ishq bhi sina-e-pak-baz men
Leave a Reply