Barae Nam Sahi Din Ke Hath Pile Hain

barā.e naam sahī din ke haath piile haiñ

kahīñ kahīñ pe abhī raushnī ke Tiile haiñ

tamām raat mire ġham kā zahr chūsā hai

isī liye tirī yādoñ ke hoñT niile haiñ

hamāre zabt kī dīvār āhanī na sahī

tumhāre tanz ke neze kahāñ nukīle haiñ

unheñ bhī aaj kī tahzīb chaaT jā.egī

kahīñ kahīñ pe jo simTe hue qabīle haiñ

badan kā loch laboñ kī miThās qurb kā lams

tasavvurāt ke sab zā.iqe rasīle haiñ

ḳhulūs-e-dil se samā.at kā imtihān to lo

ġham-e-hayāt ke naġhme baḌe surīle haiñ

Leave a Comment