bara.e naam sahi din ke haath piile hain
kahin kahin pe abhi raushni ke Tiile hain
tamam raat mire gham ka zahr chusa hai
isi liye tiri yadon ke honT niile hain
hamare zabt ki divar ahani na sahi
tumhare tanz ke neze kahan nukile hain
unhen bhi aaj ki tahzib chaaT ja.egi
kahin kahin pe jo simTe hue qabile hain
badan ka loch labon ki miThas qurb ka lams
tasavvurat ke sab za.iqe rasile hain
ḳhulus-e-dil se sama.at ka imtihan to lo
gham-e-hayat ke naghme baḌe surile hain
Leave a Reply