Athar Nafees
na shaam hai na savera ajab dayar men huun
main ek arsa-e-be-rang ke hisar men huun
sipah-e-ghair ne kab mujh ko zaḳhm zaḳhm kiya
main aap apni hi sanson ke kar-zar men huun
kashan-kashan jise le ja.enge sar-e-maqtal
mujhe ḳhabar hai ki main bhi usi qatar men huun
sharaf mila hai kahan teri ham-rahi ka mujhe
tu shahsavar hai aur main tere ghubar men huun
ata-pata kisi ḳhushbu se puchh lo mera
yahin kahin kisi manzar kisi bahar men huun
main ḳhushk peḌ nahin huun ki TuuT kar gir ja.un
numu-pazir huun aur sarv-e-shaḳh-sar men huun
na jaane kaun se mausam men phuul mahkenge
na jaane kab se tiri chashm-e-intizar men huun
hua huun qarya-e-jan main kuchh is tarah pamal
ki sar-buland tire shahr-e-zar-nigar men huun
Leave a Reply