Obaid Siddiqi
apne ba.ad haqiqat ya afsana chhoḌa tha
phuul khile the main ne jab virana chhoḌa tha
saans ghuTi jaati thi kaisa habs ka aalam tha
yaad hai jis din sabze ne lahrana chhoḌa tha
aansu gire to ḳhak-e-badan se ḳhushbu phuTi thi
menh barsa to mausam ne garmana chhoḌa tha
mere alava kis ko ḳhabar hai lekin main chup huun
sahil se kyuun maujon ne Takrana chhoḌa tha
main pahle be-bak hua tha josh-e-mohabbat men
meri tarah phir us ne bhi sharmana chhoḌa tha
Leave a Reply