gham gardish-e-dauran ke bhulae nahin jaate
ab zakhm dil-o-jan ke chhupae nahin jaate
kya ruuh ki gahrai men tum jhank rahe ho
ab raaz mohabbat ke chhupae nahin jaate
jin rah-guzaron pe tire naqsh-e-qadam hain
vo naqsh-e-qadam ham se mitae nahin jaate
zulmat ke manazir se riha ho gaiin nazren
zehnon se magar khauf ke saae nahin jaate
main kaise tilavat karun ayat vafa ki
kyon taj-mahal aaj banae nahin jaate
‘gulnar’ har ik sher se zahir hai tira gham
ashar kabhi yunhi sunae nahin jaate
Leave a Reply