Muddaa Girya Se Kuchh Ishq Ka Izhaar Nahin

muddaa girya se kuchh ishq ka izhar nahin

kya kahun tum se ki kahne men dil-e-zar nahin

is men kya zillat-e-yusuf sar-e-bazar nahin

samne tere koi us ka kharidar nahin

ho gaya aaj se bas ilm-e-qiyafa batil

sadgi se ye khula tha ki sitamgar nahin

sab tarah se to vo achchhe hain par achchhe kya hain

ik yahi aib hai kaisa ki vafadar nahin

talab-e-bosa-e-rukhsar ko jaane diije

kaun si baat hai jis men tumhen inkar nahin

yaan ye manzur ki matlab ko zaban par laaen

vaan hai angusht labon par ki khabar-dar nahin

puchhte puchhte aa jaao mere ghar ki taraf

hai pata ye ki nishan-e-dar-o-divar nahin

mere rone pe vo hans hans ke ye kahna tera

ki tunuk-zarf se chhupte kabhi asrar nahin

koi pis jaae ki kat jaae bala se un ki

kuchh khabar un ko kisi ki dam-e-raftar nahin

tar-e-anfas hain siine ke numayan varna

dekhne ko bhi gareban men koi taar nahin

sach to ye hai ki hai ‘mushtaq’ adu se achchha

varna banda to kisi ka bhi taraf-dar nahin

Leave a Comment