Imran Rahib
saste men un ko bhulna achchha laga hai aaj
chaa.e ka ek ghunT bhi kaafi raha hai aaj
rassi se jhulti hui laḌki nahin hai ye
ye na-murad-e-ishq hai laTka hua hai aaj
kis ne kaha hai ḳhair hai main to nahin gira
vo to shajar se aḳhiri patta gira hai aaj
jhagḌa huun bad-guman se chiḳha huun phone par
ye satvan tha phone jo toḌa gaya hai aaj
dastak samajh ke dar pe tu yuun dauḌ ke na ja
kal bhi hava ka kaam tha phir bhi hava hai aaj
dariya ko khinch laane de sahra ke darmiyan
maTka gharib-zadi ka pyasa paḌa hai aaj
dil but-kada raha to tu pahlu-nashin tha
ka.aba bana tu teri jagah pe ḳhuda hai aaj
‘rahib’ zaban par miri chhale se paḌ ga.e
dekha jo dar pe yaar ke taala paḌa hai aaj
Leave a Reply