Sarmad Sahbai
sar jhuka leta tha pahle jis ko akasr dekh kar
aaj pagal ho gaya us ko barabar dekh kar
ḳhvahishon men bah gaya kamzor miTTi ka hisar
jism qatre men simaT aaya samundar dekh kar
sochta huun raat ke andhe safar ke moḌ par
chand ghabraya to hoga ḳhali bistar dekh kar
aankh khulte hi har ik lamhe men mera aks tha
main bikhar jaata huun is khiḌki ke bahar dekh kar
tu hi utrega ḳharabon men faraz-e-arsh se
ham to behis ho chuke hain ab ye manzar dekh kar
chand takne ki tamanna le ke vapas aa gaya
dusron ke ghar ko apni chhat se uupar dekh kar
ab to muḌ kar bhi kisi avaz ko sunta nahin
ja-ba-ja bikhre hue saḌkon pe patthar dekh kar
mujh ko ‘sarmad’ apni bhi pahchan tak baaqi nahin
shaḳhs ik apne hi jaisa apne andar dekh kar
Leave a Reply