jaade men kya maza ho vo to simat rahe hon
aur khol kar razai ham bhi lipat rahe hon
ab aap ki damon men ham aa chuke hato bhi
khush aave pyare kis ko jab dil hi kat rahe hon
kyunkar zaban se un ki apna bachav hove
zat-o-sifat sab ke jab vo ukat rahe hon
aate the saath mere dekho to kya hue vo
aisa na ho ki pichhe rishte men kat rahe hon
tab sair dekhe koi baham ladaiyon ke
khinche hon vo to tegha aur ham bhi dat rahe hon
kya kar saken divane hal-e-dil-e-pareshan
zulfon ke baal un ke jab aap lat rahe hon
aapas men ruthne ka andaz ho to ye ho
vo ham se phat rahe hon ham un se phat rahe hon
ji chahta hai ai dil ik aisi raat aave
matla ho saaf shahra badal bhi phat rahe hon
sote hon chandni men vo munh lapete aur ham
shabnam ka vo dupatta patthe ulat rahe hon
panjam ghazal ab ‘insha’ andaz ki suna di
aghosh men maani jis ke lipat rahe hon
Leave a Reply