Anjum Ludhianvi
ḳhud se milna milana bhuul ga.e
log apna Thikana bhuul ga.e
rang hi se fareb khate rahen
ḳhushbuen azmana bhuul ga.e
tere jaate hi ye hua mahsus
aa.ine jagmagana bhuul ga.e
jaane kis haal men hain kaise hain
ham jinhen yaad aana bhuul ga.e
paar utar to ga.e sabhi lekin
sahilon par ḳhazana bhuul ga.e
dosti bandagi vafa-o-ḳhulus
ham ye sham.en jalana bhuul ga.e
Leave a Reply