divar-o-dar se chahe to rishta bana ke rakh
lekin bura na maane to dastak bacha ke rakh
tu andhiyon ke khel se vaqif nahin abhi
palkon ke taaq par na tu dipak jala ke rakh
ḳhaliq jo tu ne is ko banaya hai gul-badan
phir hasidon ke shar se bhi is ko bacha ke rakh
sun ai amir-e-shahr main momin mizaj huun
apni munafiqat se na mujh ko daba ke rakh
dushman bhi ho to us ke halaq se utar sake
lahje ke jaam ko zara miTha bana ke rakh
phir se chanab-e-hijr hai be-tab kuza-gar
mere liye ghaḌa koi kachcha bana ke rakh
Leave a Reply