Rasheed Qaisrani
main ne kahin thiin aap se baten bhali bhali
rusva kiya hai aap ne mujh ko gali gali
main ne kaha nahin tha ki sho.ala-badan hain log
ab kyuun dikha rahe ho hatheli jali jali
gulshan men jo chali hai hava kitni tez hai
bikhri paḌi hai shaḳh se kaT kar kali kali
ek aur shab ki raah men ankhen bichha.iye
ye shab ba-surat-e-shab-e-rafta Dhali Dhali
kaise sarak sarak ke bhari gagaren girin
jab mere saath saath koi manchali chali
main ne ghazal suna.i to ik ahl-e-dil ‘rashid’
siine pe haath rakh ke pukara vali vali
Leave a Reply