Poet
pher kar tegh-e-nazar tegh-e-jafa se pahle
maar Daala mujhe zalim ne qaza se pahle
ab mira ḳhun-e-jigar hathon men malte hain vo
us se nafrat thi jinhen rang-e-hina se pahle
zulf men chhune na paaya ki bandhe mere haath
di sitamgar ne saza mujh ko ḳhata se pahle
shauq-e-didar ki tezi se main aksar har sub.h
kucha-e-yar men jaata huun saba se pahle
aisi tasir pe sau jaan se sadme qurban
mere ghar aa ga.e vo meri dua se pahle
paas ‘sabir’ ka buto aaj na karna paḌta
duur rahte agar is mard-e-ḳhuda se pahle
Leave a Reply