Hayat Amrohvi
javon se ayaan teri haqiqat nahin hoti
a.ine men a.ine ki surat nahin hoti
kya shaad rahe dahr men bashinda adam ka
pardes men ji lagne ki surat nahin hoti
murjha.e hue dil pe jamin kis ki nigahen
kumhla.e hue phuul ki qimat nahin hoti
pabandi-e-a.in se majbur hain varna
darban ko asiron se adavat nahin hoti
main qaid men huun aur tasavvur mira bahar
majbur ki majbur tabi.at nahin hoti
sab kahte hain a.ina-sifat hai ye dil apna
aur aa.ine men gard-e-kudurat nahin hoti
Leave a Reply