Shafiq Saleemi
raha shamil jo mere ratjagon men kaun tha vo
jo tha taskin-e-jan tanha.iyon men kaun tha vo
miri avaz jaisi aur bhi avaz thi ik
yaqinan tha koi to parbaton men kaun tha vo
jo mere saath pahuncha manzilon tak kaun hai ye
jise main chhoḌ aaya raston men kaun tha vo
bahut milta tha mujh se vaar karne ka tariqa
jo ik mujh sa tha mere dushmanon men kaun tha vo
vo tera gham tha mera aks tha ya vahima tha
jo mere ru-ba-ru tha a.inon men kaun tha vo
kaTe sar ko hatheli par saja.e ghumta tha
miri basti ki ḳhvabida shabon men kaun tha vo
Leave a Reply