Momin Khan Momin
hui tasir ah-o-zari ki
rah gai baat be-qarari ki
shikva-e-dushmani karen kis se
vaan shikayat hai dost-dari ki
mubtala-e-shab-e-firaq hue
zid se ham tira-rozgari ki
yaad aai jo garm-joshi-e-yar
dida-e-tar ne shola-bari ki
kyuun na dar jaun dekh kar vo zulf
hai shab-e-hijr ki si tariki
yaas dekho ki ghair se kah di
baat apni umid-vari ki
bas ki hai yaar ki kamar ka khayal
sher ki sujhti hai bariki
kar de roz-e-jaza shab-e-dijur
zulmat apni siyahkari ki
tere abru ki yaad men ham ne
nakhun-e-gham se dil-figari ki
qatl-e-dushman ka hai irada use
ye saza apni jan-nisari ki
kya musalman hue ki ai ‘momin’
hasil us but se sharmsari ki
Leave a Reply