Aankh Ke Goshe Ho Kar Nam Aabaad Hue

aañkh ke goshe ho kar nam ābād hue

dil kī bastī ke sab ġham ābād hue

jaise ik dariyā chūme sahrāoñ ko

tere lams pe aise ham ābād hue

kis ne chhū kar ham ko hosh dilāyā hai

kis ke chhūne se phir ham ābād hue

dīvāreñ darvāze aur ham dīvāne

sun kar paa.el kī chham-chham ābād hue

dil ne terā naam liyā sarshārī meñ

sāñsoñ ke vīrān ridham ābād hue

Leave a Comment