Seema Naqvi
ek bas tu nahin milta hai mujhe khone ko
varna kya kuchh nahin hota hai yahan hone ko
dekh bedard zamane ki zabun-hali dekh
ek shana nahin milta hai jahan rone ko
rat-bhar ḳhud se gale mil ke bahut roti huun
jhuTe munh bhi nahin kahta hai koi sone ko
kitni maili hai havasnak nigahon ki chamak
ki samundar bhi bahut kam hai jise dhone ko
is ko bhi hijr ka tavan to bharna hoga
koi dam men hai mukafat-e-amal hone ko
meri avaz bhi mujh tak nahin pahunchegi jahan
main ne apne liye rakkha hai isi kone ko
kaise viran hain patthar se bhare khet mire
hal chalane ko nahin biij nahin bone ko
koi kis tarah mire haal se vaqif hota
meri ankhon men koi ashk na tha rone ko
kho ga.e ḳhvab to aisi bhi baḌi baat nahin
main ne baaqi hi kahan chhoḌa hai kuchh khone ko
asmanon men kise DhunD rahi huun ‘sima’
vo to baiTha hai mire dil men ḳhuda hone ko
Leave a Reply