hilti hai zulf jumbish-e-gardan ke saath saath
nagin bhi hai lagi hui rahzan ke saath saath
kis ki kuduraton se ye mitti kharab hai
kis ka ghubar hai tire daman ke saath saath
uttha tha munh chhupae hue main hi subh ko
jaata tha main hi raat ko dushman ke saath saath
kuche men us sanam ke khudai ka lutf hai
nahaq phira main shaikh o barhaman ke saath saath
dil ki tapish ne khaak udaai ye baad-e-marg
lasha phira kiya mira madfan ke saath saath
allah apne rashk ka darja bhi ab nahin
kis kis jagah gaya but-e-pur-fan ke saath saath
jhonka qafas men aaya jo bad-e-bahar ka
pahlu se dil nikal chala san-san ke saath saath
ashkon ke saath saath to maujen ghamon ki hain
ankhon ke shoale hain mire shevan ke saath saath
jis raah se guzarte hain vo, mujh se saikdon
ho lete hain junun-zada ban ban ke saath saath
zanjir mere paanv ke pichhe padi hai yuun
phirta hai rishta jis tarah sozan ke saath saath
kab tak kisi ko kholen kisi ko karen vo band
phirti hai yaan nigah to rauzan ke saath saath
yuun saath ruuh ke hai tan-e-zar ab ‘nizam’
phirta hai jaise saaya mira tan ke saath saath