gham-gusari ka hai aalam duur tak
ghaas par phaili hai shabnam duur tak
ek hi jaisi faza hai char-su
ek hi jaisa hai mausam duur tak
zaḳhm apne dekh kar zahir hua
banTta hai koi marham duur tak
chheḌti hai be-ḳhudi ke silsile
shab ke sannaTon men sargam duur tak
apne mustaqbil se hote ba-ḳhabar
dekh paate kaash jo ham duur tak
sahil-o-dariya ko ‘ḳhanda’ kya likhun
dekhti huun koi sangam duur tak
Leave a Reply