jis tarah bahr ik qatre qatre men hai
ek kahani chhupi nuqte nuqte men hai
jab se hathon men main ne uThaya qalam
tazkira bas tira panne panne men hai
ye milan ki ghaḌi yuun hui muḳhtasar
simTi jaise sadi lamhe lamhe men hai
jab se hamraz tujh ko hai main ne kiya
aam qissa mira kuche kuche men hai
khiḌkiyan to ka.i un makanon men hai
phir ghuTan kyuun yahan kone kone men hai
kyon talab ho tujhe ek ghar ki ‘hina’
ashiyan jab tira zarre zarre men hai
Leave a Reply