Jis Ko Samjhe the Tawangar Wo Gadagar Nikla

jis ko samjhe the tavañgar vo gadāgar niklā

zarf meñ kāsa-e-darvesh samundar niklā

kabhī darvesh ke takiya meñ bhī aa kar dekho

tañg-dastī meñ bhī ārām mayassar niklā

mushkileñ aatī haiñ aane do guzar jā.eñgī

log ye dekheñ ki kamzor dilāvar niklā

jab giraftoñ se bhī aage ho pahuñch muTThī kī

tab lagegā ki samundar meñ shanāvar niklā

koī mauhūm sā chehra jo bulātā hai hameñ

bādaloñ kī tarah shakleñ vo badal kar niklā

dil ajab chiiz hai kis miTTī meñ jā kar bo.eñ

jaḌ yuuñ pakḌe ki lage peḌ tanāvar niklā

laash qātil ne khulī pheñk dī chaurāhe par

dekhne vaalā koī ghar se na bāhar niklā

dekhne meñ to dhanak chand hī lamhe thī ‘anīs’

saat rañgoñ kā magar dīdanī manzar niklā

Leave a Comment