jis ko samjhe the tavangar vo gadagar nikla
zarf men kasa-e-darvesh samundar nikla
kabhi darvesh ke takiya men bhi aa kar dekho
tang-dasti men bhi aram mayassar nikla
mushkilen aati hain aane do guzar ja.engi
log ye dekhen ki kamzor dilavar nikla
jab girafton se bhi aage ho pahunch muTThi ki
tab lagega ki samundar men shanavar nikla
koi mauhum sa chehra jo bulata hai hamen
badalon ki tarah shaklen vo badal kar nikla
dil ajab chiiz hai kis miTTi men ja kar bo.en
jaḌ yuun pakḌe ki lage peḌ tanavar nikla
laash qatil ne khuli phenk di chaurahe par
dekhne vaala koi ghar se na bahar nikla
dekhne men to dhanak chand hi lamhe thi ‘anis’
saat rangon ka magar didani manzar nikla
Leave a Reply