Rashid Anwar Rashid
kya koi yaad tire dil ko dukhati hai hava
sard sannaTe men kyuun shor machati hai hava
ye ḳhabar di hai parindon ne chalo sunte hain
jhiil ke paas koi giit sunati hai hava
baagh murjha.e chaman roya hue dasht udaas
sab ko mayus kahan chhoḌ ke jaati hai hava
ḳhushbuon aao Thahar jaao hamare angan
phir isharon men baharon ko bulati hai hava
jo gaya lauT ke aaya hi nahin sarhad se
ab kise dasht men avaz lagati hai hava
jhunD men lauTne lagte hain sunahre panchhi
sukhti shaḳhon pe jab phuul khilati hai hava
ḳhair-maqdam ke liye band dariche kholo
naz-o-andaz se kis shaan se aati hai hava
Leave a Reply