Kashfi Lucknavi
hai barham phir mizaj un ka dil-e-nakam kya hoga
yahi surat rahi to ishq ka anjam kya hoga
ḳhalish dil men jigar men dard lab par mohr-e-ḳhamoshi
ye surat hai to phir mujh ko bhala aram kya hoga
ye bazm-e-naz hai ai dil yahan behtar hai ḳhamoshi
suna kar un ko apna qissa-e-alam kya hoga
yahi hai zohd ka aalam to phir ai hazrat-e-naseh
sharab-e-hauz-e-kausar ka chhalakta jaam kya hoga
abhi se aankh men aansu hain lab par aah dil men dard
ye aghaz-e-mohabbat hai to phir anjam kya hoga
ḳhudara ye bhi socho ai chaman ke chhoḌne vaalo
hain jo sahn-e-chaman men in ka ab anjam kya hoga
koi badnam ho jaa.e to is ko bhi bahut samjho
hai ye duuri ḳhudi is men kisi ka naam kya hoga
abhi to shab hai aao pyaar ki baten karen ham tum
abhi se kyuun ye sochen sub.h ka paigham kya hoga
jidhar dekho udhar zulmat nazar aati hai ai ‘kashfi’
sahar ka rang hai jab ye to rang-e-sham kya hoga
Leave a Reply