Muhib Wafa
zindan-e-roz-o-shab men asir-e-hayat huun
ik umr kaT ga.i hai magar be-sabat huun
dekho to ek zarra huun is ka.enat ka
samjho to apni zaat men ik ka.enat huun
tu mavara-e-arsh-o-zamin-o-zaman hai
main tere izn-e-kun se sar-e-shash-jihat huun
hain ka.aba-e-darun men butan-e-hava-e-nafs
har chand ki main munkir-e-lat-o-manat huun
chalti hava ke saath to abana-e-vaqt hain
main ahd-e-tirgi men charaghon ke saath huun
kyuun teri zindagi se nikala gaya mujhe
kya main tire nisab ki vajib zakat huun
Leave a Reply