Anand Narayan Mulla
hijr ki shab ghaḌi ghaḌi dil se yahi saval hai
jis ke ḳhayal men huun gum us ko bhi kuchh ḳhayal hai
ha.e-ri bebasi shauq-e-dil ka ajiib haal hai
us ka javab sun chuka phir bhi vahi saval hai
ḳhvab-o-fusun nahin to kya dil ye junun nahin to kya
ḳhalvat-e-dost aur tu tera kahan ḳhayal hai
main tire dar ko chhoḌ duun shart-e-vafa ko toḌ duun
sonch ḳhud apne dil men tu kya ye miri majal hai
sharm si nazar dil ki hai uThti nahin nigah-e-shauq
ishq ki manzilon men ik manzil-e-infi.al hai
chahenge gar to dil ki baat aap hi jaan lenge vo
munh se kahun to kya kahun shakl miri saval hai
baat unhin ki maan li jaise main hi ḳhata pe tha
un ko kahin ye shak na ho dil men mire malal hai
ab tiri justuju hui himmat-e-dil ke hasb-e-zauq
tu ne ye jab se kah diya ye talab muhal hai
sat.h-e-mazaq-e-bazm par ‘mulla’ utar ke aana to
auron ka jo kamal hai tere liye zaval hai
Leave a Reply