mahz dil-lagi ke vo andaz nikle
tere sab ishare daghabaz nikle
badal dene ka vaqt bharte the jo dam
vo sab inqilabi ghaḌi-saz nikle
vo likhti hai qisse uḌan-tashtari ke
kisi tarah to shauq-e-parvaz nikle
samajh kar ada ham ghazal kah rahe the
vo ba-qa.eda ham se naraz nikle
mohabbat ki boTi yuun aTki gale men
raha jaa.e chup hi na avaz nikle
li shab bhar talashi huzur-e-jigar ki
havale se un ke ka.i raaz nikle
Leave a Reply