Rauf Raheem
jahezon ke liye baḌhti rahengi talḳhiyan kab tak
jala.i ja.engi sasural men ye laḌkiyan kab tak
uḌa.enge dinner men saare leader murghiyan kab tak
re.aya kunDiyon men DhunDh khaa.e haDDiyan kab tak
gul-e-pazhmurda par aḳhir rahengi titliyan kab tak
rachaenge janab-e-shaiḳh aḳhir shadiyan kab tak
hai ghar men team cricket ki zara tu sharm kar zalim
girani ke zamane men ye liimu kairiyan kab tak
tumhare va.ade va.ade hain kabhi puure nahin hote
samundar men rahengi kaghzi ye kashtiyan kab tak
muhafiz hi jo dushman hon hamare mal-o-izzat ke
batao kis tarah jhele re.aya saḳhtiyan kab tak
‘rahim’ ab sha.iri chhoḌo lagao paan ka Dibba
bagharenge janab-e-shaiḳh-chilli shaiḳhiyan kab tak
Leave a Reply