Fahmida Riaz
mai.n aazim-e-mai-Khaanaa thii kal raat ki dekhaa
ik kuucha-e-pur-shor me.n ashaab-e-tariiqat
the dast o girebaa.n
Khaakam-ba-dahan pech amaamo.n ke khule the
fatvo.n kii vo bochhaa.d ki tabqaat the larzaa.n
dastaan-e-mubaarak me.n thii.n riishaan-e-mubaarak
muu-haa-e-mubaarak the fazaao.n me.n pareshaa.n
kahte the vo baaham ki hariifaan-e-siyah-ruu
kuffaar hai.n bad-Khuu
zindiiq hai.n maluun hai.n bante hai.n musalmaa.n
haatif ne kahaa ro ke ki ai rab-e-samaavaat!
laa-raib saraasar hai.n bajaa dono.n ke fatvaat
Khilqat hai bahut un ke azaabo.n se hiraasaa.n
ab un kii ho.n amvaat!
Leave a Reply