Shahnaz Parveen Sahar
ghubar-e-vaqt men ab kis ko kho rahi huun main
ye barishon ka hai mausam ki ro rahi huun main
ye chand puura tha be-iḳhtiyar ghaTne laga
ye kya maqam hai kam-umr ho rahi huun main
is abr-e-baran men manzar barasne lagte hain
baras rahi hai ghaTa baal dho rahi huun main
main gard-bad ka ik sar-phira bagula thi
ḳhala.en oḌh ke ru-posh ho rahi huun main
ye shaam vaqt se pahle chhupa na de suraj
sunahri dhuup men chunari bhigo rahi huun main
udaas os men gum-gashta ansuon ki kasak
larazti kanpti maala piro rahi huun main
ḳhala men kho ga.iin baten hansi ki avazen
suḳhan-shikasta huun alfaz kho rahi huun main
main ji rahi huun ya jiine ka vahm hai mujh ko
na-jane jaag rahi huun ki so rahi huun main
ye zard shaam jo suraj ganva.e baiThi hai
‘sahar’ sitara-e-aflak ho rahi huun main
Leave a Reply