Khalid Moin
dasht-e-vahshat ko faqat qais hi bhaya hua hai
ham ne bhi ishq ka azar uThaya hua hai
sar-kashi mauj-e-hava kii, ye kahan samjhegi
kis mashaqqat se diya ham ne jalaya hua hai
kaise gulfam kahun, kaise sitara samjhun
vo badan aur hi miTTi ka banaya hua hai
mauj-e-ḳhushbu ki tarah haath na aane vaale
ham ne ik saath bahut vaqt bitaya hua hai
aap ise kasa-e-tash.hir samajh baiThe hain
ham ne ik umr se ye zaḳhm chhupaya hua hai
kaash vo chashm-e-gurezan bhi kabhi jaan sake
ham ko kis ḳhvab ki vahshat ne jagaya hua hai
Leave a Reply