akhilesh-tiwari

Kaghaz Pa Harf Harf Nikhar Jaana Chahiye

kaghaz pa harf harf nikhar jaana chahiye

be-chehragi ko rang men bhar jaana chahiye

mumkin hai asman ka rasta inhin se ho

niile samundaron men utar jaana chahiye

har-dam badan ki qaid ka rona fuzul hai

mausam sadaen de to bikhar jaana chahiye

sahra men kaun bhiik kise dega chhanv ki

ḳhud apni oT men hi Thahar jaana chahiye

tanha safar men raat ke is pichhle vaqt men

avaz koi de to kidhar jaana chahiye

jis se bichhaḌ ke ho gae sahra-navard ham

ab tak to us ke zaḳhm bhi bhar jaana chahiye

paani ko rokti ho jo ‘akhilesh’-ji ana

ḳhud pyaas ko nadi men utar jaana chahiye

More Poems

Leave a Comment