ishq ki garmi-e-bazar kahan se la.un
yusuf-e-dil ka ḳharidar kahan se la.un
sunte hi naghmon ki ik lahr ragon men dauḌe
main tiri shoḳhi-e-guftar kahan se la.un
vahi shorida-sari hai vahi iza-talabi
ishq men jada-e-hamvar kahan se la.un
ho ga.iin ankhon se vo mast nigahen ojhal
ishrat-ḳhana-e-ḳhummar kahan se la.un
dil ki dhaḌkan men suna karta tha paigham tira
ab vo hangama-e-bisyar kahan se la.un
us par a.ina ho kis tarah haqiqat dil ki
shauq-e-minnat-kash-e-iz.har kahan se la.un
ma.abad-e-dil men parastar-e-mohabbat huun ‘asar’
ravish-e-kafir-o-din-dar kahan se la.un
Leave a Reply