mahv-e-hairat huun zamin-zade kahan tak aa ga.e
jin ko rahna tha zamin par asman tak aa ga.e
raz-e-ulfat dil men rakhne ki qasam khaa.i magar
jab hava badli to vo nok-e-zaban tak aa ga.e
hadson ne dil ki barbadi pe meri bas na ki
vo miTane ko mira nam-o-nishan tak aa ga.e
ḳhud-kushi thi ya taqaza-e-numu-e-shauq tha
dil ke dariya ab-e-bahr-e-be-karan tak aa ga.e
zaḳhm-e-dil ki daad paane ki tavaqqo.a jin se thi
vo to ulTe jan-o-dil ke imtihan tak aa ga.e
kamrani haft-ḳhvan-e-shuq ki janenge ham
DhunDte ain-e-yaqin vahm-o-guman tak aa ga.e
barq-raftari men ‘rahi’ sar kiya vo sang-e-mil
the farishte bhi pas-e-ru ham jahan tak aa ga.e
Leave a Reply