Siddique Mujibi
mire chehre se gham a.ankhon se hairani na ja.egi
yahi surat rahegi aur pahchani na ja.egi
tumhara jhuuT mere sach ka qatil hai magar duniya
tumhari maan ja.egi miri maani na ja.egi
ana sar chaḌh ga.i hai ik bagule ki tarah aisi
ki sar ja.ega ik din ḳhu-e-uriyani na ja.egi
tumhare paas zanjiren hamare dast o pa zaḳhmi
lahu zinda hai jab tak apni man-mani na ja.egi
mira dukh bhi navishta hai miri taqdir ka shayad
jo main gul huun to meri chak-damani na ja.egi
saba avara phirti hai navah-e-jan men barson se
ye vo ḳhitta hai jis se us ki virani na ja.egi
qalam dil men Dubo kar bhi ‘mujibi’ kuchh na haath aaya
ye vo ehsas hai jis ki pashemani na ja.egi
Leave a Reply