Nirmal Nadeem
gali men ishq ki chala to husn ka fusun chala
fareb kha ke aadmi vahan se sar-nigun chala
raha vo saath jab talak mahak rahi thi rahguzar
hamare saath saath jaise lashkar-e-sukun chala
nibha saki na saath ashiqon ka ka.enat bhi
qadam qadam mila ke sirf jazba-e-junun chala
taḌap uThi hai tishnagi labon pe mere is qadar
na aa.e jaam mujh talak ye daur men na yuun chala
mujhe hua yaqin apne ishq ke shabab par
jab ansuon ke raston pe mere dil ka ḳhuun chala
nigah-e-naz se nigah milne ki umiid thi
tamam umr chashm-e-tar men ḳhvab guna-gun chala
paron se us ke kaT ga.e bulandiyon ke asman
uḌaan bhar ke jab havaon par dil-e-zabun chala
guzar ga.i sadi ye fikr-e-tir-e-chashm-e-naz men
tamam jism chhoḌ kar ye sirf dil pe kyuun chala
hazaron andhiyan simaT ke paanv se lipaT ga.iin
uTha to phir ‘nadim’ ishq ki hadon se yuun chala
Leave a Reply