Tanhaiyon Ki God Mein Pal Kar baDa Hua

tanhā.iyoñ kī god meñ pal kar baḌā huā

bachpan se apne aap sambhal kar baḌā huā

ġhairoñ ko apnā maan ke jiitā rahā huuñ maiñ

is rāh-e-pul-sirāt pe chal kar baḌā huā

maiñ ne kabhī bhī raat se shikva nahīñ kiyā

har shab kisī charāġh sā jal kar baḌā huā

patthar se koī vāsta matlab na thā magar

har aa.ine kī aañkh meñ khal kar baḌā huā

maḳhmal kī chādaroñ kā mujhe kyā pata ki maiñ

kāñToñ ke bistaraoñ ko masal kar baḌā huā

Leave a Comment