fikr-e-tamir-e-ashiyan bhi hai
khauf-e-be-mehri-e-khizan bhi hai
khaak bhi ud rahi hai raston men
amad-e-subh ka saman bhi hai
rang bhi ud raha hai phulon ka
ghunche ghunche sharar-fishan bhi hai
os bhi hai kahin kahin larzan
bazm-e-anjum dhuan dhuan bhi hai
kuchh to mausam bhi hai khayal-angez
kuchh tabiat miri ravan bhi hai
kuchh tira husn bhi hai hosh-ruba
kuchh miri shokhi-e-bayan bhi hai
har nafas shauq bhi hai manzil ka
har qadam yad-e-raftagan bhi hai
vajh-e-taskin bhi hai khayal us ka
had se badh jaae to giran bhi hai
zindagi jis ke dam se hai ‘nasir’
yaad us ki azab-e-jan bhi hai
Leave a Reply