Fartash Syed
gundh ke miTTi jo kabhi chaak pe aa jaati hai
baat be-mehri-e-aflak pe aa jaati hai
asmanon pe uḌo zehn men rakkho ki jo chiiz
ḳhaak se uThti hai vo ḳhaak pe aa jaati hai
rang-o-ḳhushbu ka kahin koi kare zikr to baat
ghuum phir kar tiri poshak pe aa jaati hai
bikhra bikhra sa hai andaz-e-takallum un ka
aur tohmat mire idrak pe aa jaati hai
naḳhl mahfuz rahen bad-e-havadis jo chale
ek aafat ḳhas-o-ḳhashak pe aa jaati hai
chhoḌ jaa.e jo koi chahne vaala ‘fartash’
zindagani rah-e-saffak pe aa jaati hai
Leave a Reply