Hashim Raza Jalalpuri
badan se ruuh ham-aghosh hone vaali thi
phir is ke ba.ad subuk-dosh hone vaali thi
nasib paḌh ke mira ilm-e-ghaib ki devi
yaqin janiye behosh hone vaali thi
na sirf tegh ki pi kar mire lahu ki sharab
zamin-e-dasht bhi mad.hosh hone vaali thi
nigar-ḳhana-e-dil men ye dhaḌkanon ki ghaḌi
tire na aane se ḳhamosh hone vaali thi
main ek laḌka vafa-dariyon ka parcham-dar
vo ek laḌki jafa kosh hone vaali thi
miri javani talash-e-ma.ash men ‘hashim’
vatan se duur faramosh hone vaali thi
Leave a Reply