jurm ulfat ki mujhe ḳhuub saza deta hai
ḳhat ko paḌhta bhi nahin aur jala deta hai
TuuT jaate hain sabhi a.ina-ḳhane mere
jab taḳhayyul tiri tasvir bana deta hai
mere hakim ko bahut bar-e-garan guzrega
koi zalim hai jo zanjir hila deta hai
us ke aane ki mujhe jhuTi tasalli mat do
ye dilasa to mira dard baḌha deta hai
mere ahbab ko kuchh sochna hoga ‘da.em’
mera dushman mujhe jiine ki dua deta hai
Leave a Reply