Man Jis Ka Maula Hota Hai

man jis kā maulā hotā hai

vo bilkul mujh sā hotā hai

āñkheñ hans kar pūchh rahī haiñ

niiñd aane se kyā hotā hai

miTTī kī izzat hotī hai

paanī kā charchā hotā hai

jāntā huuñ mansūr ko bhī maiñ

apne hī ghar kā hotā hai

achchhī laḌkī zid nahīñ karte

dekho ishq burā hotā hai

vahshat kā ik gur hai jis meñ

qais apnā bachcha hotā hai

ba.az-auqāt mujhe duniyā par

duniyā kā bhī shub.h hotā hai

tum mujh ko apnā kahte ho

kah lene se kyā hotā hai

Leave a Comment