junun men ham rah-e-ḳhauf-e-ḳhatar se guzre hain
jidhar se koi na guzre udhar se guzre hain
saf-e-salib jahan intizar karti thi
masih-e-vaqt usi rahguzar se guzre hain
main Duub Duub ke ubhra huun har talatum se
hazar sail-e-ravan mere sar se guzre hain
jo kal the baiThe hue gesuon ke saa.e men
vo aaj tapti hui rahguzar se guzre hain
sukut-e-sham men yadon ke karvan ‘mahir’
dil-e-tabah ke ujḌe nagar se guzre hain
Leave a Reply